Grootmenswêreld, hier kom Jannas!

Grootmenswêreld, hier kom Jannas! Hoërskool Jan Viljoen se matriekklas van 2020 was opgewonde toe hulle op Dinsdag, 23 Februarie uiteindelik hul uitslae ontvang het.   1 Maart 2021   Verlede jaar was een van onsekerheid maar vir die Hoërskool Jan Viljoen-matriekklas van 2020 was dit glad nie ‘n struikelblok nie.   Jannas se nou oudmatrieks het op 23 Februarie angstig by die skoolsaal ingestap om te sien of hul harde werk gedurende die pandemiejaar vrugte afgewerp het. Dit was ‘n lang wag, maar hulle kon uiteindelik asemhaal toe hulle daardie gesogte sertifikaat in hul hande gehou het.  Sommige leerders het reeds vroeg skool toe gekom vir wat die laaste keer sal wees om hulle matriekuitslae te kry.   Nadat die spanning gebreek is, was daar baie glimlagte. Daar is ook gesels oor hul uitslae en toekomsplanne.  Baie het vertel dat dit nie te moeilik was om in ‘n pandemie matriek te doen nie en dat hulle baie beter presteer het as wat hulle verwag het. Almal het een ding in gemeen – hulle is opgewonde oor die toekoms en om die grootmenswêreld te betree.   Hier is wat sommige Jannas-matrikulante van 2020 te sê gehad het: “Ek voel fantasties dat ek finaal uit matriek uit is,” het Mandrè-Lee Joubert gesê.  Chanique Stone het vertel dat dit onwerklik voel om klaar te wees met skool, en dat die pandemie dit moeilik maar ook normaal gemaak het om matriek te doen. Dit gaan beter want nou is die stres weg. Volgens George Schmulling was dit nie maklik om alles self te doen nie, maar dit het hulle ‘n voorsmakie van die studentelewe gegee. “Dit is vir my verskriklik awesome om klaar te wees met skool. Dit maak my eintlik hartseer om die vriende agter te laat, maar om ‘n nuwe begin te hê en aan te gaan met my lewe is baie cool,” het Dalèèn Nel vertel. Vir Adél Roos was dit ‘n bietjie moeilik om in ‘n pandemie te swot maar sy is bly dit is verby. Monique van Dyk gaan haar drome volg en ‘n verpleegster word. “Ek is trots op my punte. Met die pandemie het ek nie gedink ek gaan so goed doen nie, maar ek sien daarna uit om Pukke toe te gaan,” het Lee Ann van Dyk vertel. Nicolene van Dyk het gespog dat sy al haar vereistes nagekom het en dat sy opgewonde is oor haar uitslae. Sy gaan saam met haar twee sussies Pukke toe. Egan Geldenhuys het vertel dat sy positief voel oor haar punte en dat sy deur is. “Ek is baie opgewonde oor wat die toekoms inhou,” het Nadine Horn laggend gesê. “Ek is baie trots op my punte!,” het Annerie Duvenage vertel. Monique van Dyk, Lee-Ann van Dyk en Nicolene van Dyk gaan al 3 Pukke toe. Foto: Michelle Roodt Nadine Horn is opgewonde oor die toekoms. Foto: Michelle Roodt Mande-Lee Joubert voel fantasties! Foto: Michelle Roodt Daleen Nel is reg vir 'n nuwe begin. Foto: Michelle Roodt Egan Geldenhuys voel positief oor haar punte. Foto: Michelle Roodt Adél Roos is bly dit is verby. Foto: Michelle Roodt

Ses nuwe onderwysers vir Jannas!

Ses nuwe onderwysers vir Jannas! Hoërskool Jan Viljoen is baie opgewonde om hierdie nuwe onderwysers by hulle te verwelkom.   1 Februarie 2021   Hoërskool Jan Viljoen het die voorreg om ses nuwe onderwysers by hulle skool te verwelkom nog voor die nuwe skooljaar begin.   Die nuwe onderwysers is baie opgewonde oor hierdie nuwe hoofstuk in hulle lewens.  Hulle is Heine Kleinhans, Maruschka Meiring, Rayno Wagner, Gazelle Kylander, Dirkie Marais en Anesta Kloppers.  Heine gaan onderrig gee in Tegniese Wetenskap en Fisiese Wetenskappe, Maruschka gee Sosiale Wetenskappe en Lewensoriëntering, Rayno gee Wiskunde en Lewensoriëntering Sport, Gazelle gee Natuurwetenskap, Dirkie gee Wiskunde Geletterdheid en Lewensoriëntering Sport, en Anesta gee Afrikaans.  Hoërskool Jan Viljoen sien baie daarna uit om die nuwe onderwysers aan die Jannas-leerders voor te stel. Gazelle Kylander, Dirkie Marais, Anesta Kloppers Foto: Michelle Roodt Agter:  Heine Kleinhans, Maruschka Meiring, Rayno Wagner Foto: Michelle Roodt Agter:  Heine Kleinhans, Maruschka Meiring, Rayno Wagner Voor:  Dirkie Marais, Anesta Kloppers en Gazelle Kylander Foto: Michelle Roodt

Jannas verwelkom nuwe jong Adjunkhoof

Jannas verwelkom nuwe jong Adjunkhoof Die 33-jarige Chris-Juan Ras is opgewonde oor sy nuwe pos as adjunkhoof by Hoërskool Jan Viljoen.   1 Februarie 2021   Hoërskool Jan Viljoen is baie opgewonde om hulle nuwe adjunkhoof, Chris-Juan Ras, 33, by die Jannas-familie te verwelkom.  Chris-Juan het sy B- en honneursgraad aan die Noord-Wes Universiteit in Potchefstroom verwerf en vir die afgelope 12 jaar by Glenharvie Combined skoolgehou waar hy onderskeidelik in sy eerste departementele pos asook in ‘n departementshoofpos aangestel is.  Hy het vertel dat dit vir hom die nodige ervaring gegee het om aansoek te doen by Hoërskool Jan Viljoen.   Ek is opgewonde oor hierdie nuwe begin by Jannas en sien daarna uit om ‘n verskil te maak, omdat dit die regte skool daarvoor is.”   Chris-Juan besef dat hy nog eers sy voete moet vind, maar hy is gereed vir sy taak. “Ek wil die kinders op ‘n holistiese vlak ontwikkel, soos wat Jan Viljoen alreeds doen. Wanneer hulle eendag terugkyk moet hulle kan sê dat hulle gegroei het in die aspekte waarin hulle reeds goed gevaar het, en beter gevaar het in afdelings waarmee hulle voorheen gesukkel het.”   Hy het vertel dat hy passievol is oor sport en kultuur as ‘n geheel, en dit by Jan Viljoen wil verbeter. In 2016 is Chris-Juan by die National Teacher Awards as die Distrikwenner aangewys en het daarna die Distrik by die Gautengse toekennings verteenwoordig waar hy as die nommer een-onderwyser vir laerskoolonderrig in Gauteng aangewys is.   ‘n Persoonlike doelwit wat hy het is om eendag ‘n skoolhoof te word. Chris-Juan Ras is die nuwe adjunkhoof by Hoërskool Jan Viljoen Foto: Michelle Roodt

‘n Lewe na Matriek

'n Lewe na Matriek Hoërskool Jan Viljoen se matrieks van 2020 is reg om die grootmenswêreld te betree.   29 Desember 2020 Daleen Nel Jacorene Visser George Schmulling Henro Steyn Monique van Dyk

Jannas-matrieks opgewonde oor nuwe skooljaar

Jannas-matrieks opgewonde oor nuwe skooljaar Zurica van Heerden Louis Smit Nicole Roodt Ronaldo Pretorius Michelle Kruger

Jannas se nuwe leiers vir 2021 is …

Jannas se nuwe leiers vir 2021 is … Hoërskool Jan Viljoen spog met hul groep leiers wat die skool gedurende 2021 sal lei. December 11, 2020   Hoërskool Jan Viljoen het onlangs hul Verteenwoordigende Raad vir Leerders (VRL) vir die nuwe termyn van 2020/ 2021 aangewys.   Meneer Sarel Steyn, hoof van Hoërskool Jan Viljoen het gesê dit was lekker om uiteindelik ‘n bietjie saam met die nuwe groep leiers en hul ouers te kuier ten spyte van ‘n baie deurmekaar jaar.   Die hoofseun en -dogter vir 2021 is Louis Smit en Zurica van Heerden, en die onderhoofseun en -dogter is Austin Nel en Nicole Roodt. Anje Grové is verkies as sekretaresse.   Ons is ongelooflik trots op elke leerder wat tot die VRL verkies is en ons is opgewonde om te sien wat julle volgende jaar met al die opwindende projekte gaan vermag.   Douglas McArthur, een van die VSA se grootste militêre leiers het gesê:  "A true leader has the confidence to stand alone, the courage to make tough decisions, and the compassion to listen to the needs of others.” Nicole Roodt (onderhoofdogter), Louis Smit (hoofseun), Zurica van Heerden (hoofdogter), Austin Nel (onderhoofseun), en Anje Grové (sekretaresse) Foto: Anita Nel van Nianda Studio

Jannas-atlete haal uit en wys tydens Gauteng-kampioenskappe

Jannas-atlete haal uit en wys tydens Gauteng-kampioenskappe Vier atlete van Hoërskool Jan Viljoen het aan die Gauteng-kampioenskappe deelgeneem.   11 Maart 2020   Vier atlete van Hoërskool Jan Viljoen is gekies om aan die Gauteng-atletiekkampioenskappe deel te neem.   Die leerders het Vrydag, 6 Maart en Saterdag 7 Maart aan die kampioenskappe deelgeneem wat by die Ruimsig Stadion gehou is.   Hierdie vier Jannas-atlete is vir die Gauteng-kampioenskappe gekies: • Arno Jansen van Vuuren: o.19-hoogspring • Juanita Bester: o.19-driesprong • Eddy Mahlayeye: 100m hekkies en verspring vir o.15’s • Keagan Taylor: o.15-diskus   Arno ‘n vierde plek behaal met ‘n persoonlike beste hoogte van 1,94m.  Hoërskool Jan Viljoen wens die atlete baie geluk met hul wonderlike prestasies Juanita Bester, Eddy Mahlayeye, Keagan Taylor en Arno Jansen van Vuuren Foto: Tammy Smith

Jannas se nuwe Graad 8 Graadverteenwoordigers

Jannas se nuwe Graad 8 Graadverteenwoordigers Jannas het hul nuwe Graad 8 Verteenwoordigende Raad van Leerders (VRL) aangewys.   6 Maart 2020   Hoërskool Jan Viljoen het onlangs hul nuwe Graad 8 Verteenwoordigende Raad van Leerders (VRL) aangewys.   Dit is met groot opgewondenheid dat ons die nuwe leiers verder kan ontwikkel om eendag op Jannas se topbestuur te dien en dalk bestuursposte by hulle werke te beklee.   Daar is ongelooflike sterk leierseienskappe onder die leerders en dat Jan Viljoen nie kan wag om te sien wat die toekoms vir hulle inhou nie. Ayden Peach, Hestia Bouwer, Jeneva Welkom en Itumeleng Motitsoe

Evan is gebore met vele talente

Evan is gebore met vele talente 16 Februarie 2020   Evan Grobbelaar van Hoërskool Jan Viljoen het die asems weggeslaan met sy vermaaktalent tydens vanjaar se groentjiekonsert. Maar dis nie al wat hy kan doen nie … Om ‘n talent vir iets te hê is glad nie vreemd vir dié Graad 10-leerder nie.   Hy is in November 2019 as die tweede beste klavierspeler in Suid-Afrika aangewys, maar Evan speel nie net klavier nie. Sy kennis van musiek strek ver. “Ek speel ook kitaar, elektriese kitaar, ukulele en trom,” het hy vertel.   Daarbenewens is Evan as die 2019 Pom-pom van die Jaar aangewys.   “Ek is nie juis die fiksste of maerste persoon nie maar ek sê nie nee vir ‘n uitdaging nie. Voor ek my oë kon uitvee was ek deel van ‘n wonderlike span wat uiteindelik die wenners van die 2019 Randfontein Skou se pom-pomkompetisie was.

Jannas-groentjiekonsert sorg vir groot vermaak

Jannas-groentjiekonsert sorg vir groot vermaak 27 Januarie 2020   Hoërskool Jan Viljoen se nuwe groep Graad 8-leerders het hulle gate uit geniet by die 2020-groentjiekonsert.  Na weke van groentjies wees is die Graad 8’s nou amptelik deel van die Jannas-gesin. Hulle het hul ontgroeningstyd afgesluit deur die jaarlikse groentjiekonsert aan te bied.  Loer gerus hier wat die Graad 8’s vir die gehoor aangebied het …

Onvergeetlike Ope dae!

Onvergeetlike Ope dae! 26 April 2018   "PUIK!  Dit was regtig wonderlik!"  "Dankie vir julle gasvryheid en die pragtige uitstallings.  Ons het regtig op ons gemak gevoel." Wat het die graad 7's van besoekende laerskole beweeg om sulke woorde te spreek?  Op 17 en 18 April 2018 het ongeveer 300 graad 7 leerders by Jannas gekuier tydens ons baie suksesvolle ope dae.  Hierdie jaar wou ons 'n groot, helder beeld hê deur middel van die tema:  Neon.  Dit was 'n uitnodiging om te sê, kom wees deel van ons groot, vriendelike voetspore!   Jannas se inligtingsaande, gehou op Woensdag, 18 April en Donderdag, 19 April was 'n groot sukses.  Ouers is in die saal verwelkom deur ons hoof, mnr Sarel Steyn waarna verskeie sprekers gevolg het.  Die graad 7 leerders en hulle ouers het 'n asemrowende vertoning deur Jannas pom-poms geniet waarna die graad 7's verdaag het en lekker om die kampvuur gaan kuier het.  Ouers is in verskeie groepe verdeel na die vergadering en deur die skool geneem deur verskeie toerleiers.   Die Departement van Onderwys se aanlyn registrasies vir 2019 open op Maandag 16 April 2018 en sluit op 28 Mei 2018 vir voornemende Graad 8's.

Jannas J-Squad deur na die volgende rondte van World of Dance

Jannas J-Squad deur na die volgende rondte van World of Dance 26 April 2018   Jannas se pom-poms is welbekend vir hul prestasies in Randfontein asook buite die dorp.  Een daarvan was om vir vyf agtereenvolgende jare as die kampioen van die Randfontein Skou gekroon te word.  Hul afrigter is die bekende Mario Gomes.   Op 15 April 2018 neem ons pom-poms vir die eerste keer deel aan die internasionale dans kompetisie, World of Dance, wat gehou is by Gold Reef City in die Lyric Theatre.   Groot was die opgewondenheid toe die beoordelaars aankondig dat ons asemrowende pom-poms deurdring na die volgende rondte.  Hierdie kompetisie sal gehou word op Sondag, 13 Mei 2018.   Ons is trots op Jannas pom-poms wat ons skool se naam hoog hou.

Michelle se nagtegal stem maak opslae

Michellé se nagtegal stem maak opslae 25 April 2018 Michellé Kruger, 'n graad 8 leerder van Hoërskool Jan Viljoen, het nog altyd 'n passie, en met dié passie wat haar lewe dryf is dit duidelik dat dié jong kunstenaar nog groot opslae in die musiekbedryf wil maak. Michellé sing al reeds van die ouderdom 5-jaar.   “Ek het baie vroeg in my lewe besef dat my stem ʼn gawe uit God se hand uit is, daarom is dit vir my ʼn voorreg om te sing,” vertel Michellé.   Behalwe vir Michelle se talent agter die mikrofoon, speel sy ook graag klavier, blokfluit en kitaar.  Sy is tans deeltyds besig met haar Graad 4 in musiek aan die universiteit van Suid-Afrika (Unisa). Haar debut album, Die oomblik is nou, het in 2016 die lig gesien. Michellé is gedurende 2017 as Jannas se kultuur dogter van die jaar aangewys. “Dit was vir my ʼn groot voorreg om die toekenning te ont-vang. Dit wys net weer dat my Godgegewe talent erken word en dat ek dit nooit onder ʼn maatemmer moet wegsteek nie,” vertel Michellé trots.   Michellé het ook gedurende 2017 aan die Raca Kunswedstryd deelgeneem en met mikrofoon in die hand een van dié kunswedstryd se grootste toekennings losgesing. Michellé is tydens die 2017 Raca Kunswedstryd as die algehele wenner in die sang afdeling aangewys.   Michelle vertel dat dit haar droom is om eendag ʼn voltydse loopbaan van haar passie vir sing te maak en dat sy dit geniet om te sing. Sy verduidelik dat dit haar grootse doelwit om eendag ʼn professionele kunstenaar te wees.  Michelle se droom is om eendag haar eie musiekskool oop te maak om ander kinders soos sy te help om hul talent te ontgin.

Van Trolle tot ware Jan Viljoeners

Van Trolle na ware Jan Viljoeners! 15 Februarie 2018 Die eens Peske-Moeske-Woeske-Tinke-Troll-Molle is nou ware Jannas-leerders! Die voormalige Peske-Moeske-Woeske-Tinke-Troll-Molle – ook bekend as Graad 8’s – is nou ware Jannas-leerders.  Maandag, 12 Februarie 2018 was 'n besondere dag in die lewens van hierdie Graad 8’s.   Die leerders is nou ware Jan Viljoeners en is daarom welkom geheet deur ‘n erewag van honderde trotse ouers en die skool se VRL. Die res van die skool het opgewonde vir die leerders hande geklap terwyl hulle in volle skooldrag op maat van tradisionele marsmusiek die saal binnegestap het.  Meneer Steyn, ons nuwe skoolhoof, het die leerders herinner dat hulle verantwoordelik is vir hulle eie keuses en dat dit hul sukses bepaal. “Jy kies jou vriende. Jy kies of jy wil werk of nie. Werk hard en jy sál suksesvol wees. Onthou altyd, You can do it!” Juffrou Steyn, een van die Graad 8-voogde, het riglyne vir sukses gegee en Spreuke 2:6 en Filippense 4:8 voorgelees:  “Ons is geskape om volmaak te wees – om suksesvol te wees en om gelukkig te wees.”

Jannas Troll by groentjiekonsert

Jannas Troll by groentjiekonsert 9 Februarie 2018 Honderde Peske-Moeske-Woeske-Tinke-Troll-Molle, ook bekend as 2018 se Jannas Graad 8-leerders, is op 7 en 8 Februarie 2018 by Hoërskool Jan Viljoen met ‘n groentjiekonsert uit die boonste rakke verwelkom.   In vanjaar se groentjiekonsert het die Groentjeis ‘n tipiese dag in ‘n Graad 8-leerder se skoene uitgebeeld. In plaas daarvan om een of twee hoofkarakters vir die konsert aan te wys, is daar vier of vyf hoofkarakters uit elke klas gekies. Dit is om almal deel van die pret te maak en niemand uit te sonder nie.  Daar is gesing, gedans en drukkies uitgedeel – nes dit regte Trolle betaam. Die gehoor is vermaak met liedjies uit die Troll-fliek en die Graad 12-leerders het seker gemaak dat hul eie keuse van liedjies die gehoor laat skaterlag het.   Daar was ook ‘n spesiale gaskunstenaar, Nico Swartz wat bekend is vir sy danspassies langs Hendrik Potgieterweg in Roodepoort, wat spesiaal kom dans het op maat van Robbie Wessels se Mpe Di Hoenor.   Die teks vir dié jaar se konsert is deur twee Jannas se dinamiese onderwyseresse geskryf, Bianca Briedenhann en Nirica Crous.   Soos al die vorige jare was 2018 se groentjiekonsert 'n REUSE sukses.

Jannas slaggereed vir die atletiekseisoen

Jannas slaggereed vir die atletiekseisoen 2 Februarie 2018 Hoërskool Jan Viljoen se Interhuis atletiek is gehou op, 19 Januarie 2018.   Nuwe talent is tydens Jannas se Interhuisatletiekbyeenkoms ontdek.   Die atletiekseisoen is dié dag amptelik afgeskop toe die onderskeie grade met mekaar meegeding het.  Daar was veral opgewondenheid oor die nuwe Graad 8-atlete wat die oë laat rek het en dan natuurlik die senioratlete wat soos altyd gewys het wat in hulle steek.   Daar was 'n groot verrassing tussen 10:00 en 10:30.  Jannas leerders het geesgevang en Varsity Sports, NWU en Twizza (die borge van die geleentheid) het ‘n opname daarvan gemaak.  Na afloop hiervan het elke leerling 'n gratis koeldrank ontvang.   Die Graad 10-groep het as wenners vir die dag weggestap.   Zurica van Heerden is as die Junior Victrix Ludorem, Freddy Friggins as die Junior Victor Ludorem, Angelique van Niekerk as die Senior Victrix Ludorem en Arno Jansen van Vuuren as die Senior Victor Ludorem aangewys.  Jannas wens elkeen van hierdie leerlinge geluk met hulle puik prestasies.   Jannas is slaggereed vir die Interhoër wat sal plaasvind op 13 Februarie 2018 te Sasolburg.  

Jannas verwelkom groot groep graad 8’s

Jannas verwelkom groot groep graad 8's 1 Februarie 2018   Hoërskool Jan Viljoen het ons nuwe groep Graad 8’s – beter bekend as die Peske-Moeske-Woeske-Tinke-Trolle-Molls – op die eerste dag van die nuwe skooljaar verwelkom.   Hierdie groep graad 8's is die grootste getal graad 8-leerders wat Jannas in jare ontvang het.  Ons spog met 6 Afrikaanse en drie Engelse klasse.   Die Graad 8’s volg ‘n goedgekeurde inburgeringsprogram vir die eerste vier weke waartydens hulle aan verskeie aktiwiteite deelneem om hulle in te lyf in die Jannas-familie. Die leerders lyk te spoggerig met hul trol-poniesterte en molgesiggies. Hulle oefen ook vir die Groentjiekonsert wat  aangebied gaan word.   Jannas hoop dat die graad aggies elke "trol"-oomblik sal geniet en dat hulle gou deel sal word en bly van ons pragskool.   Jannas sien uit na die Groentjiekonsert wat gehou sal word op 7 en 8 Februarie 2018.

Jannas het ‘n nuwe hoof

Jannas het 'n nuwe hoof 19 Januarie 2018 Hoërskool Jan Viljoen word die jaar 80 en saam met die mylpaal het Jannas ‘n splinternuwe hoof!   “En die nuwe hoof is … Sarel Steyn!” David Mokgabanama, IDSO, het hierdie aankondiging amptelik op Maandag, 15 Januarie aan die Hoërskool Jan Viljoen-personeel en skoolbeheerliggaam(SBL) gemaak.   Die nuus het luide applous ontlok.  Meneer Steyn is ‘n man met integriteit, doelgerigtheid en ‘n vlymskerp intellek.  Meneer Steyn is reeds sedert 1991 by Hoërskool Jan Viljoen betrokke: eers as onderwyser en toe in 1993 as departementshoof.  In 2003 is hy bevorder tot Adjunkhoof: Akademie.   Meneer Steyn is voorwaar 'n pluspunt vir Jannas, aangesien hy die skool en die gemeenskap baie goed ken.  Meneer Steyn is altyd bereid om die ekstra myl te loop en is geliefd onder die personeel en leerders omdat hy uiters bekwaam en taakgerig is en terselfdertyd leerders, ouers en personeel met respek behandel.   Meneer Steyn is ‘n ongelooflike administrateur en alle fasette van sy werk dra ‘n stempel van deeglikheid en planmatigheid. Meneer Steyn is ‘n uitstekende leier en kweek respek en lojaliteit met sy bestuurstyl. Sy grootste bates is sy kalmte en dat hy daarin glo om personeel te bemagtig.  Meneer Steyn is ‘n nederige man wat waardegedrewe leef.  Hy is ‘n ervare onderwysman wat glo aan deelnemende bestuur. Jannas se personeel groot waardering vir sy vermoë om vernuwend en kreatief te dink.   Ashley Cowan, president van Hoërskool Jan Viljoen se Seniorraad is van mening dat meneer Steyn ‘n briljante hoof sal wees en dat sy en die Verteenwoordigende Raad van Leerders baie opgewonde oor sy aanstelling is. Hulle het al baie nou saam met hom gewerk in die jare toe hy hulle as VRL-voog geïnspireer het, en die respek waarmee hy alle mense behandel, het haar nog altyd beïndruk.   Meneer Steyn is baie opgewonde oor die nuwe uitdaging en het groot drome vir Hoërskool Jan Viljoen.  Jannas vier boonop vanjaar hul 80ste verjaarsdag en daarom is hul jaar tema: Trots en kragtig op 80!   Die Jannas-familie sien daarna uit om ‘n nuwe, opwindende reis saam met meneer Steyn, ons nuwe hoof, aan te pak.

Jannas matrieks 2017 gesels oor hul toekoms

Jannas matrieks 2017 gesels oor hul toekoms 9 Januarie 2018   Op Vrydag, 5 Januarie 2018, het Jannas matrieks om 8 uur by die skool bymekaar gekom om hulle matriek resultate te ontvang.  Matrieks 2017 het nie geskroom om van hul planne vir die toekoms te vertel nie.   Van die jong manne het genoem dat hulle verder wil studeer terwyl ‘n ander in die mynbedryf wil gaan werk.  Diaandri Schoonraad vertel dat sy 'n lugwaardin of vlugkelner wil word, terwyl Bianca Maree graag vroue met grimering op 'n passasierskip wil bederf.   Oor die algemeen was almal trots op hul prestasies en sien uit na die pad vorentoe.  Jannas se beste wense vergesel die matriekgroep van 2017!

Jannas gereed vir 2018

Jannas gereed vir 2018 3 Januarie 2018   Die drimpel van die Oujaar is deurgetrap en die nuwe jaar se silhouette neem reeds vorm aan op die horison en met luide ontwaking van 'n nuwe jaar omvou die stille wete in ons harte...   God wag reeds daar in die onbekende nuwe jaar, mag God se seëninge ons Jannas-familie die hele jaar agtervolg en omvou soos 'n sagte wol kombers!   Hoërskool Jan Viljoen is ongelooflik geseën in 2017 en sien uit na ‘n nuwe jaar vol uitdagings!   Voorspoedige 2018 aan ons Jannas-familie!

 486 total views